काठमाडौं । अख्तियार दुरुपयोग अनुसन्धान आयोगले सोलुखुम्बुको सोताङ गाउँपालिकाकी उपाध्यक्ष अन्जु नाछिरिङ राई र उनका छोरा सुनिल नाछिरिङ राईविरुद्ध भ्रष्टाचार मुद्दा दायर गरेको छ ।
आयोगका अनुसार आर्थिक वर्ष २०८०/८१ मा सञ्चालित ९० कार्यदिनको ढाका सिलाइ–बुनाइ तालिममा प्रशिक्षकको रूपमा काम दिलाइदिने भन्दै उपाध्यक्ष अन्जुले ४५ हजार रुपैयाँ घुस मागेकी थिइन् ।
अनुसन्धानका क्रममा उक्त रकम उपाध्यक्ष अन्जुको निर्देशनमा उनका छोरा सुनिलको बैंक खाताको क्यूआर कोडमार्फत जम्मा गर्न लगाइएको खुलेको अख्तियारले जनाएको छ ।
अख्तियारले उपाध्यक्ष अन्जुविरुद्ध भ्रष्टाचार निवारण ऐन, २०५९ को दफा ३(१) को देहाय (क) बमोजिम कारबाहीको मागदाबी गर्दै ४५ हजार रुपैयाँ बिगो कायम गरेको छ ।
त्यस्तै, आमासँगको मिलेमतोमा घुस रकम लिई प्रयोग गरेको आरोपमा सुनिलविरुद्ध पनि ४५ हजार रुपैयाँ बिगो कायम गरिएको छ । उनीविरुद्ध सोही ऐनको दफा ३(२) बमोजिम सजायको मागदाबी गरिएको अख्तियारले जनाएको छ।
